Төлеби ауданы, Жоғарғы Қасқасу ауылында 21 жастағы жігіт тоқ соғып қайтыс болды. Тұрғындардың айтуынша, өрімдей жастың өліміне ескірген электр желісі себеп болған. Қалың бау арасындағы бағаналардың орнатылғанына 50 жылдан асса керек. Іріп-шіріген бағандар жел тұрса, құлайды. Содан қауіптенген ауыл тұрғындары жоғары кернеулі электр желісін көше бойымен жүргізуді талап етіп отыр.
Керімжан Сегізбаев 12 қазанда үлкен ұлының тойын жасағалы отырған. Енді міне қапыда қара жамылып, кейінгі ұлының жаназасын шығарды. Баласы алма теріп жүріп, тоққа түсіп қалған.
Керімжан Сегізбаев, марқұмның әкесі:
«Қанша жерге шағымдандық. Аудан әкіміне де, Нұр Отанға да бардық. Бәрі уәдені үйіп-төгіп берді, бірақ біреуі де орындалған жоқ. Міне, арыстандай азаматымнан айрылып отырмын бүгін, өздеріңіз куәсіздер. Енді бұдан кейін не істеуге болатынын білмеймін. Ана бағанды лажы болса құртыңыздар, құртпайсыздар ма, мен аралап тастайм…»
Марқұм Азамат отбасындағы 6 баланың екіншісі еді. Жоғарғы оқу орнының соңғы курсында оқып жүрген. Сол күні досы екеуі алма теруге шықса керек. Ағаштың ұшар басындағы жемісті алу үшін темір сатыны көтеріп келе жатқанда, жоғары кернеулі тоқ өткізілген желіге тиіп кеткен. Ал, сатының екінші ұшын ұстаған жігіт аман қалды.
Жұмағали Есмұрзаев, Жоғарғы Қасқасу аулының тұрғыны:
«Линияны көріп тұрсыздар, төрт-ақ метр. Пәс жерде орналасқан. Сымның бойымен 10 мың вольт тоқ жүріп тұр. Ондай кернеу нені болсын өртеп жібереді. Менің балам да аң-таң: ток оны да ұшырып жіберген ғой. Қайта сатының түбі жерге тиіп аман қалған ғой ол. Әйтпесе, бүгінде екі бірдей азаматтан айрылып отырар едік…»
Бағандардың орнатылғанына жарты ғасыр болған дейді тұрғындар. Жел тұрса құлайды, жауын болса жарқылдайды, тіпті ескіріп шірігендері өртенген кездері де болған дейді олар.
Жарылқасын Мырзахметов Жоғарғы Қасқасу ауылының тұрғыны:
«Оншақты жылдың көлемі боп қалды ғой бұны қозғап жатқанымызға. Барамыз, болды тас қып береміз дейді, жоқ ешқандай. Бұл не қылған баған? Аса жоғарғы вольтты. Бер жақта застава, ар жағында демалыс орны жатыр. Желінің ауыспағанына қанша жыл болды. Әлі қаншама адамды жалмайтынын құдай білсін мұның. Машинаның үстіне түссе, машина өртенеді, малға түссе малды өлтіреді. Адам өтсе адамды өлтіреді. Міне, өліп жатыр ғой басы…»
Бұл ауылда небәрі жүз шаңырақ бар. Адамның амандығын ойлаған ауыл тұрғындары жоғары кернеулі желіні көше бойымен жүргізгенін талап етеді. Қазіргі жағдайы өте қауіпті. Мұны жергілікті атқарушы орган өкілдері де мойындап отыр. Дегенмен олар бір жағы тұрғындардың өзін де кінәлап отыр.
Мейіржан Дүйсебаев, Төлеби ауданы, Қасқасу ауылдық округі әкімінің орынбасары:
«Қауіпті болғанда, бұл бағандар негізінде олардың қорасына дейін салынған. Яғни, қора да, үй де кейін салынған. Тұрғындар жоғарғы вольтті сым өтіп жатқанын көре тұра үй салып, шарбақтарын қоршап алған, былайша айтқанда. Кейін легализация кезінде құжаттарын туралап алған. Ендеше, тұрғындардың өзі кінәлі ме? Кінәлі. Барлығы болмаса да, біразы кінәлі.
Дегенмен енді сең қозғалатын секілді. Әкімдер энергетиктермен келісіп қораға тиіп тұрған электр бағаналарын сыртқа жылжытамыз деп отыр.
